பாராளுமன்றத்தில் நேற்று திங்கட்கிழமை இடம்பெற்ற வரவு- செலவுத்திட்ட குழு நிலை விவாதத்தை ஆரம்பித்து வைத்து உரையாற்றும்போதே ஜோன் அமரதுங்க எம்.பி. இதனைத் தெரிவித்தார்.
சபையில் அவர் தொடர்ந்து உரையாற்றுகையில்,
வட மாகாண சபை முதலமைச்சர் சி.வி. விக்கினேஸ்வரனின் அழைப்பின் பேரில் இந்திய பிரதமர் மன்மோகன்சிங் மற்றும் பிரதிநிதிகள் யாழ்ப்பாணம் விஜயம் மேற்கொள்வதை பிரதான எதிர்க்கட்சியென்ற ரீதியில் கடுமையாக எதிர்க்கின்றோம். பொதுநலவாய மாநாட்டுக்கு கலந்துகொள்ளாத மன்மோகன்சிங் ஒரு முதலமைச்சர் ஒருவரின் அழைப்பின் பேரில் இங்கு வர முடியாது. ஒரு நாட்டின் தலைவர் இலங்கை வரவேண்டுமென்றால் எமது நாட்டு ஜனாதிபதியே அழைப்பு விடுக்க வேண்டும்.
அதைவிடுத்து முதலமைச்சர் ஒருவருக்கு இந்திய பிரதமருக்கு அழைப்பு விடுக்க முடியாது. இதனை பிரதான எதிர்க்கட்சியென்ற ரீதியிலும் நாட்டை நேசிக்கும் கட்சியென்ற ரீதியிலும் கடுமையாக எதிர்க்கின்றோம்.
பொதுநலவாய மாநாட்டை இலங்கையில் நடத்தியதால் எமக்கு கிடைத்த பலன் என்ன ?
பிரிட்டிஷ் பிரதமர் கமரூன் இங்கு வந்தார். இறுதியில் என்ன நடந்தது? அவர் இலங்கைக்கு எதிரான கருத்துகளை வெளியிட்டு வெளியேறினார்.
அதாவது இங்கு இடம்பெற்ற மனித உரிமைகள் மீறல் தொடர்பாக சர்வதேச விசாரணை நடத்தப்பட வேண்டுமென்று கமரூன் வலியுறுத்திச் சென்றுள்ளார். பிரிட்டிஷ் பாராளுமன்றத்திலும் இதனை வலியுறுத்தியுள்ளார். அத்தோடு பொதுநலவாய நாடுகள் அமைப்பின் சட்டங்களையும் அரசாங்கம் மீறியுள்ளது. இவ்வமைப்பைச் சார்ந்த நீதிபதிகள் சங்கம் இங்கு வருவதற்கு விசா மறுக்கப்பட்டது.
சனல் 4 ஊடகவியலாளர் மக்ரே தலைமையில் ஊடகவியலாளர்களுக்கு விசா வழங்கிவிட்டு எதிர்ப்பு ஆர்ப்பாட்டம் நடத்தப்பட்டது.
யாழ்ப்பாணம் அக்குழு சென்றபோது மதவாச்சியில் புகையிரதம் முன் ஆர்ப்பாட்டம் நடத்தப்பட்டு திருப்பி அனுப்பி வைக்கப்பட்டனர். இவையெல்லாம் எமது நாட்டுக்கு அபகீர்த்தியையே ஏற்படுத்தியுள்ளது.
சனல் 4 ஊடகவியலாளர்களுக்கு தன்னோடு கோப்பி குடிப்பதற்கு ஜனாதிபதி அழைப்பு விடுத்தார்.
ஆனால், மறுபுறம் மக்ரேவுக்கு எதிராக எதிர்ப்பு ஆர்ப்பாட்டங்கள் நடத்தப்பட்டன. இவ்வாறான செயற்பாடுகளால் பொதுநலவாய மாநாடு இங்கு நடத்தப்பட்டதன் பயனாக எதுவித நன்மையும் கிடைக்கவில்லை.
அத்தோடு ஜனாதிபதி இவ்வமைப்பின் தலைவராக பதவி கிடைத்தாலும் அதன் பயன் அற்றுப் போய்விட்டது.
எதிர்க்கட்சித் தலைவருக்கு தகுந்த மதிப்பு வழங்கப்படவில்லை. அவரது அறையில் பாம்பு போடப்பட்டுள்ளது. இந்தப் பாம்பு எப்படி படியேறி அல்லது மின் தூக்கியில் ஏறி எதிர்க்கட்சித் தலைவரின் அலுவலகத்திற்கு வந்தது. சிறிகொத்த முன் ஆர்ப்பாட்டம் நடத்தப்பட்டு அவரது வாகனம் தாக்குதலுக்கு உள்ளாக்கப்பட்டது.
ஆனால், இதுவரையில் எதுவிதமான விசாரணைகளும் நடத்தப்படவும் இல்லை, எவரும் கைது செய்யப்பட்டு சட்டத்தின் முன் நிறுத்தப்படவும் இல்லை. உலகின் விசாலமான நாடுகளான இந்தியாவில் 32 அமைச்சர்களே உள்ளனர்.
சீனாவில் அமைச்சர்களின் தொகை 27 ஆகும். ஆனால், இங்கு சிறிய நாட்டில் அமைச்சர்கள் தொகை 65 க்கும் மேலாக உள்ளது. அரச தரப்பு ஆதரவுடன் ஊழல் மோசடிகள் தலை தூக்கியுள்ளன. பெரும்பாலான அமைச்சர்கள் தொடர்பில் ஊழல் மோசடி குற்றச்சாட்டுகள் இலஞ்ச ஊழல் திணைக்களத்தில் உள்ளன.
ஆனால், எதுவும் விசாரிக்கப்படுவதில்லை. மூலையில் போடப்பட்டுள்ளன.
சாதாரண பொலிஸ்காரர் சிறிய இலஞ்சம் ஒன்றை பெற்றுவிட்டால் விசாரணைகள் நடத்தப்படுகின்றன. ஆனால், பாரிய ஊழல் மோசடிகளில் ஈடுபடுவோர் சுதந்திரமாக சுற்றித் திரிகின்றனர். தேர்தல்கள் திணைக்களம் இன்று பல் பிடுங்கப்பட்ட சிங்கமாகவே செயற்படுகிறது. அதன் செயற்பாடுகள் அனைத்தும் செயலிழந்துள்ளன. தேர்தல்களின்போது சுயாதீனமாக இயங்குவதில்லை.
எனவேm மீண்டும் 17ஆம் திருத்தச் சட்டத்தை அமுல்படுத்தி சுயாதீன தேர்தல்கள் ஆணைக்குழுவை நியமிக்க வேண்டும். பொதுநலவாய நாடுகள் அமைப்பின் சட்டங்களை தலைவரென்ற ரீதியில் ஜனாதிபதி நடைமுறைப்படுத்த வேண்டும். இல்லாவிட்டால் தலைமைப் பதவியும் பறிபோகும். இவ்வமைப்பும் இல்லாமல் போய்விடும்.
நாட்டில் இன்று நீதித்துறையின் சுயாதீன த்தன்மையும் இல்லாமல் போயுள்ளது. எதிர்க்கட்சியினருக்கு வீடமைப்புத் திட்டம் நிர்மாணிக்கப்படவுள்ளதோடு சுகாதார வசதிகள் தொடர்பான திட்டங்களும் முன்னெடுக்கப்படவுள்ளன. இதனை வரவேற்கின்றோம். அதேவேளை, எதிர்க்கட்சித் தலைவருக்குரிய மதிப்பு வழங்கப்படுவதில்லை.